NASUGAMAK si Tomjune Mangubat sa 8th round knockout nga kapildihan batok kang Arnel Baconaje sa main event sa #Kumbati 2 sa Park Mall sa Mandaue City.

Usa ka makusog ug antimanong right overhand ni Baconaje ang nagpatumba kang Mangubat sa ika-1:37 minutos sa 8th round.

Sa interbyu sa Sun.Star Cebu, nagkanayon ang trainer ni Mangubat nga si Jinggoy Junco nga nataymingan ang iyang boksidor apan malaumon siyang makabawi ra kini gikan ning maong kapakyasan.

Si Mangubat, kinsa usa sa mga boksidor sa Omega stable, nakaangkon sa labing una niyang kapildihan.

Midakin-as ang rekord ni Mangubat sa 10-1-1, 9KOs samtang misaka ang baraha ni Baconaje sa 11-3, 9KOs.

Sa iyang kadaugan, naangkon ni Baconaje ang WBC Asia Silver featherweight title.

“It’s back to the drawing board for us. We let him fight again soon after 90 days as per the GAB mandatory rest period,” asoy ni Omega Pro Sports International (Opsi) vice-president Jerome Calatrava. (ESL)