MAGPABILING commissioner si Willie Marcial sa Philippine Basketball Association (PBA) sa magsunod nga laing tulo ka mga tuig.

Ang board of governors nagkahiusa sa paghatag kang Marcial og tulo ka mga tuig nga contract extension alang sa pagdumala sa labing unang professional nga liga sa Asya atol sa ilang tinuig nga planning session sa Star Hotels sa Milan, Italy.

Aduna pa unta’y usa ka tuig nga nahabilin sa iyang orihinal nga tulo ka mga tuig nga kontrata si Marcial apan gitagaan siya og bag-ong vote of confidence gumikan sa iyang maayong pagdumala.

“We re-appointed the commissioner to another three-year term,” matod ni board chairman Ricky Vargas nga napatik sa PBA.PH.

Si Vargas mihulagway kang Marcial kaniadto nga ‘Healing Commissioner’ gumikan sa iyang pagpabalik sa panaghiusa sa PBA Board nga nagkagubot duha na ka mga tuig ang nakalabay.

“We were open, transparent about his performance, talked to him and the whole board. The Board decided to re-appoint him to another three-year term,” dugang ni Vargas. (ESL)