MIABOT sa Manila gikan sa Maldives si American boxer superstar Floyd Mayweather kagahapon, taho sa www.abs-cbnnews.com.

Ang private plane nga gisakyan ni Mayweather mitugpa mga alas 3:30 sa kadlawon ug mihunong kini sa pribadong luna diin gisugat siya sa iyang Pinoy nga higala nga si Lester Codog sa Foilacar Industries.

Nagkanayon si Codog nga kon motugot ang kahigayunan, posibleng mapahigayon ang pribadong panaghugpong nila ni Mayweather ug World Boxing Assoiciation (WBA) welterweight champion Manny Pacquiao.

Gamit ang iyang gisakyang private plane, si Mayweather nakatakdang molarga paingon sa Boracay sa alas 7:00 sa buntag.

Gipasabot ni Codog nga kalit-kalit ang pagbiyahe ni Mayweather dinhi sa nasod.

Niadtong 2015 unang nag-engkuwentro sila si Mayweather ug Pacquiao diin midaog ang Amerikanong boksidor pinaagi sa unanimous decision.

Niadtong Septiyembre sa miaging tuig, nagkatagbo sila si Mayweather ug Pacquiao sa Japan hinungdan nga ninglanog ang hungihong kabahin sa ilang panag-away og balik.

Si Pacquiao daan nang nag-ingon nga andam siyang makigharong pagbalik kang Mayweather ug nagdepende ra ang tanan kang Mayweather. (ESL)