MAAYONG pagkatumba nga daw sama og naigo sa kumo si Floyd Mayweather Jr. atol sa usa ka charity basketball game nga gipahigayon didto sa Los Angeles niadtong Martes.

Sa usa ka Monster Energy 50K Charity Challenge, ang retirado ug undefeated boxer hugot nga miguwardiya sa usa ka inilang streetball player nga si Larry “Bone Collector” Williams.

Sa wala damha, samtang mipakita si Williams sa iyang kahanas nga modribol, kalit kining mihata paglusot sa wala nga bahin ni Mayweather.

Sa unsang pagka unsaa sa pagtuo nga moderitso og lusot si Williams daling misunod aron modepensa si Mayweather, apan mao na lay iyang nakita nga mihunong kini og kalit dayon og itsa sa three-point area, ug sa samang higayon nawagtangan siya sa balanse hinungdan nga natukay-ang siya sa sawog.

Milanog ang hugyaw sa mga tawo sulod sa Arena ug way hasta si Mayweather gibati og kahimuot sa nahitabo kaniya.

Sama sa iyang higpit nga karibal sa boxing nga si Manny Pacquiao, si Mayweather usa usab ka basketball fan. (JBM)