ANG kanhi miyembro sa National University (NU) chess team nga si Vince Angelo Medina maoy milangkat sa titulo sa 4th Boy “Chessmoso” Pestaño Memorial Chess Tournament niadtong Dominggo, Oktubre 25, 2020 sa lichess.org.

Ang taga Cabuyao, Laguna nga si Medina mikulit og 12.0 puntos aron daugon ang torneyo nga parti sa selebrasyon sa ika-30 nga anibersaryo sa Cebu Executives and Professionals Chess Association (Cepca).

Si Medina usa ka ex-former Philippine junior standout, mikampiyon na sab sa dagko nga mga torneyo sama sa Shell National Youth Active Chess, Asean Age Group Chess Championships ug Palarong Pambansa.

Gilupig sa 24-anyos nga si Medina si Rowell Roque alang sa kampiyunato sa maong torneyo nga gipahinungod kang anhing Pestaño nga maoy founding president sa Cepca ug kanhi chess columnist sa SuperBalita Cebu ug SunStar Cebu.

Si Roque maoy mikuha sa ikaduhang puwesto human niya gilupig si Merben Roque sa tiebreak.

Ang Cepca nagpasalamat sa suporta sa Pestaño family, Engr. Jerry Maratas, Engr. Roberto Inocian, Engr. Josito Clamor Dondon, Engr Alex Chua, Engr. John Velarde sa the Barracks Chess Club, architect Filemon Kapuno III, Dr. Edwin Cablao, Atty. William Cordova, Dr. Leo Lofranco, Ronald Arnado, Engr. Vince Dela Torre, Antonio Cabibil, ug Norman Martin Olayvar. (RSC)