NA-FINALIZE na kagahapon ang pagbalhin ni Carmelo Anthony sa Houston Rockets alang sa sunod nga season sa National Basketball Association (NBA).

Mipirma si Anthony og usa ka tuig nga kontrata nga nagbalor og $2.4 million alang sa Rockets, nga usa sa title contenders sa Western Conference.

Sa miaging buwan, gi-trade si Anthony sa Oklahoma City Thunder ngadto sa Atlanta Hawks una kini gibuhian sa Hawks.

Mismong si Houston general manager Daryl Morey ang mianunsyo sa opisyal nga pagbalhin ni Anthony sa ilang balwarte unya nag-post ang Rockets og hulagway sa social media sa pinirmahay og kontrata.

Ang 34 anyos nga beterano makigtambayayong nila ni MVP James Harden ug star point guard Chris Paul sa pag-agak sa Rockets.

Ang Rockets, nga katapusang nakatilaw og titulo niadtong 1995, nakasulod sa Western Conference finals sa miaging season apan gilupig sila sa Golden State Warriors nga nahimong back-to-back champions.

Sa miaging season sa iyang pagduwa sa Thunder, si Anthony nag-average lang og career-low nga 16.2 puntos.

Mikanaog ang average ni Anthony kumpara sa nag-una niyang 15 ka mga tuig nga pagduwa sa NBA ubos sa kampo sa Denver Nuggets ug New York Knicks diin siya ang labing sinaligan ning mga panahuna. AFP, ESL