GIANUNSYO sa Los Angeles Lakers kagahapon nga ang basketball fans nga nagtinguhang motambong sa public memorial ni Kobe Bryant ug sa iyang anak nga si Gianna karong Pebrero 25 (RP time) sa Staples Center kinahanglang magparehistro aron makapalit og tiket.

Gituyo kining maong lakang aron malikayan ang grabe nga pagdasokdasok sa mga tawo.

Ang mga tiket nagkantidad og $24.02 pasaka hangtod na sa $224 (P11,000 kapin) diin ang mga numero niini adunay kalambigitan nila ni Bryant ug Gianna.

Ang No. 24 nagrepresentar sa numero nga gigamit ni Bryant sa iyang pagduwa sa National Basketball Association (NBA) unya ang No.2 gigamit sab ni Gianna sa iyang girls basketball team.

Ang halin sa tiket ihatag nga benepisyo alang sa Mamba and Mambacity Sports Foundation nga gipanag-iya ni Bryant.

Nagsugod na kagahapon ang pagpangrehistro.

Kahinumdoman nga atol sa kamatayon ni Bryant, grabe ang pagdasok sa mga tawo sa Staples Center ug dili gusto sa Lakers management nga mausab kini.

Gipahibalo sab sa Lakers nga wala’y isalida nga video screens sa gawas sa Staples Center o sa L.A. Live entertainment area.

Gisugyotan ang mga tawo nga wala’y tiket sa dili na lang pagtunga duol sa Staples Center aron malikayan ang pagdasokdasok.

Wala na’y laing mga detalye nga gibuhian ang Lakers kabahin sa public memorial.

Si Bryant, kinsa sa Lakers lang nagduwa sa iyang 20 ka mga tuig sa NBA, ug Gianna, nakabsan sa ilang kinabuhi gumikan sa helicopter crash niadtong Enero 26 sa Calabasas, California.

Aduna pa’y laing pito ka mga sakay sa helicopter ang ningpanaw sab.

Ang patay’ng lawas nila ni Bryant ug Gianna gilubong niadtong Pebrero 7 sa Pacific View Memorial Park sa Corona del Mar, California nga nahimutang duol sa panimalay sa pamilyang Bryant.

Sa laing bahin, opisyal nang gipanganlan si Bryant isip usa sa finalists sa Basketball Hall of Fame, tulo ka mga semana gikan sa iyang kamatayon.

Si Bryant nahimutang sa ikaupat nga dapit sa NBA all-time scoring leaders, 5-time champion, two-time NBA Finals MVP ug one-time regular MVP.

“I’ve never seen in my long life an athlete passing that had the impact that Kobe’s passing had on people, people on the street, people that didn’t even know him,” matod ni Jerry Colangelo, kinsa maoy tsirman sa Naismith Memorial Basketball Hall of Fame.

“In my case it was personal... so much more difficult for me and family.” / AP, ESL