WALA nay plano nga moduwa pa ang star guard sa University of Cebu (UC) Webmasters nga si Darell Shane Menina sa sunod season sa Cebu Schools Athletic Foundation, Inc. (Cesafi).

Kini human napakyas na usab ang Webmasters sa ilang tinguha nga makaangkon sa kampiyonato sa dihang napildi sila sa defending champion University of the Visayas (UV) Green Lancers sa semifinals round, 76-75, niadtong Sabado.

Sa dihang gikahinabi sa Superbalita, si Menina mitug-an nga plano niya nga mobalik sa kaulohan diin didto siya motiwas sa iyang pag-eskuwela ug ipadayon ang iyang basketball career.

“Bisan asa ana UAAP OR NCAA Sir basta mabalik Manila ko,” matod ni Menina.

Hinuon dili bag-o ni Menina ang pagduwa sa kaulohan sanglit nakaduwa na kini siya sa Mapua Institute of Technology (MIT) ubos ni coach Atoy Co sa wala pa kini mobalik dinhi sa Sugbo. (JBM)