SUWAYAN pagbawi ni Anthony Joshua ang iyang heavyweight titles gikan kang Andy Ruiz Jr. sa dili pa motiklop kining tuiga pinaagi sa paggamit sa rematch clause sa ilang kontrata, matod ni promoter Eddie Hearn.

Pinaagi sa iyang Twitter account, gibutyag ni Beam nga nagtinguha si Joshua og dinaliang rematch batok kang Ruiz, kinsa nipakaging sa kalibutan sa boksing pinaagi sa 7th round knockout nga kadaugan sa premiro nilang away.

“After meetings with AJ, (trainer) Rob (McCracken) and the management team in NY, we have today triggered the contracted rematch clause with Andy Ruiz Jnr,” post ni Hearn.

“The fight will take place in Nov/Dec at a venue to be confirmed shortly.”

Ang kadaugan ni Ruiz batok kang Joshua niadto lang Dominggo sa Madison Square Garden sa New York gikonsiderar nga usa sa labing makapakurat nga nahitabo sa kasaysayan sa heavyweight boxing.

Sa iyang kadaugan, nailog ni Ruiz gikan kang Joshua ang World Boxing Association, International Boxing Federation ug World Boxing Organization (WBO) heavyweight titles. (AFP, ESL)