Mokabat ngadto sa $65,000 o P3.3 milyones ang nagasto na ni ex-NBA player Josh Smith sa iyang mga tattoo.

Matod pa sa kanhi Atlanta Hawks star nga posible gani nga mas dako pa niini ang iyahang nagasto. Lakip na sa iyang giihap sa gasto mga ang airfare ug ubang expenses sa iyang tattoo artists.

Bisan pa tuod sa kadako sa iyang napagawas nga kwarta, wa magmahay si Smith niini kay, sigon pa niya nga “worth it” tanan niyang patik.

Usa sa patik ni Smith mao ang hulagway sa iyang mga anak ug ginikanan.

Sigon pa sa 36-anyos nga si Smith nga dili pa siya mohunong sa pagpa-tattoo. Pero matod niya nga dili gyud siya magpapatik sa nawong.

Sa dihang gipangutana kon kinsay NBA players ang adunay nindot nga patik, tubag ni Smith mao sila Jayson Tatum, Lamelo Ball ug Kevin Durant.

Ang 6-foot-9 forward nasulod sa NBA isip 17th overall pick sa Atlanta Hawks sa tuig 2004. Miretiro siya human sa 13 ka tuig sa NBA.

Ang mga teams ni Smith mao ang Atlanta (2004-2013), Detroit Pistons (2013-2014), Houston Rockets (2014-2015, 2016), Los Angeles Clippers (2015-2016) ug New Orleans Pelicans (2017).

Sa iyang NBA career nakatali si Smith og 12,996 puntos (14.5 ppg), 6,653 rebounds (7.4 rpg), 1,713 blocks (1.9bpg).

Matod pa sa hoopshype.com, sa 13 ka tuig ni Smith sa NBA ang iyang total salary mokabat ngadto sa $138, 622, 422 o P7 bilyones.