Sugdan na karong adlawa, Mayo 19, 2021 (RP time), ang bag-ong format nga gisunod sa National Basketball Association (NBA) nga mao ang play-in tournament.

Ning higayuna, ang No. 7 hangtod ngadto sa No. 10 teams sa Eastern Conference mao ang magkombati.

Karong alas 6:30 sa buntag, ang No. 9 Indiana Pacers (34-38) mo-host batok sa No. 10 Charlotte Hornets (33-39) unya mosunod ang engkuwentro sa No. 7 Boston Celtics (36-36) batok No. 8 Washington Wizards (34-38) sa alas 9:00 sa buntag.

Ang modaog tali sa Celtics ug Wizards moabante sa playoffs isip No. 7 team sa Eastern Conference samtang ang mapilde makigbatok sa modaog sa sangka tali sa Pacers batok Hornets aron ilugan ang No. 8 ug katapusang puwesto sa playoffs.

Ning bag-ong format, seguradong ihabwa sa nangahilambigit nga teams ang tanan nilang ikabuga gumikan kay grabe ka krusyal ang mga engkuwentro.

Sa Washington-Boston nga parisan, dili ikalimod nga makonsiderar nga inilog ang Wizards gumikan kay nahuman nila ang regular season nga taas ang ilang moral.

Bati ang pagsugod sa Wizards sa season ug mirehistro kini’g 3-12 nga rekord sa nag-una nilang 15 ka mga duwa.

Apan sa pagpangulo sa ilang duha ka mga lider nga sila si Russell Westbrook ug Bradley Beal, gihuman nila ang season pinaagi sa 17-6 nga rekord sa katapusan nilang 23 ka mga duwa hinungdan nga nakaabot sila ning puntoha.

“We fought through so much to get here,” batbat ni Westbrook. “Nobody believed that we’d be here. And it’s only up from here.”

Sa ilang bahin, ang Celtics maayong nakasugod sa season apan nagsalimoang sila sa hinapos nga bahin hinungdan nga wala sila nakaderetso sa playoffs.

Naglisod na ang Celtics dihang nakaangkon og season-ending wrist injury ang usa sa ilang mga sinaligan nga si Jaylen Brown. (AP)