PANGULOHAN ni Brooklyn Nets forward Kevin Durant ang 16 ka mga magduduwa sa National Basketball Association (NBA) nga mokombati sa NBA 2K video game tournament.

Nagkanayon ang NBA ug ang esports group niini nga ang katuyoan sa torneyo mao ang pagtigom og pinansyal nga pundo aron itabang sa pagsumpo sa makalilisang nga coronavirus disease (Covid-19).

Si Durant, kinsa maoy labing bantugang magduduwa sa NBA nga nataptan sa Covid-19, maoy top-seed sa torneyo nga sugdan karong Abril 4, 2020 ug mahuman karong Abril 12, 2020.

Ning maong torneyo, ang mga magduduwa magtigi sulod sa ilang tagsatagsa ka panimalay. Ang torneyo gianunsyo mga tulo ka semana gikan niadtong gisuspenso sa NBA ang ilang mga duwa human nasuta nga positibo sa Covid-19 ang pambatong sentro sa Utah Jazz nga si Rudy Gobert, kinsa maoy labing unang magduduwa sa NBA nga nataptan ning maong sakit.

Si Durant, kinsa kasamtangang nagpaalim sa iyang Achilles injury, maoy mosugod sa torneyo diin iyang ikaparang si Miami Heat forward Derrick Jones Jr.

Ang mokampiyon sa torneyo maoy mopili og charitable institution nga makadawat sa $100,000 nga donasyon alang sa relief effort nga adunay kalambigitan sa Covid-19.

"The winner will be crowned the ultimate NBA 2K20 champion and select a charity beneficiary to receive a $100,000 donation from 2K, the NBA and the NBPA in support of ongoing coronavirus relief efforts," opisyal nga pamahayag sa NBA.

Ang round one ug round two mosubay sa single elimination samtang ang semi-finals ug finals kombatihon pinaagi sa best-of-three series. (AP, ESL)