Mga duwa karon

3:00 pm- NorthPort

batok Blackwater

6:00 pm- Magnolia

batok Meralco

Hingpit nang mohangop sa “new normal” ang Philippine Basketball Association (PBA) Governor’s Cup sugod karong adlawa, Marso 2, 2022 sa Smart Araneta Coliseum.

Nagpasabot kini nga motugot na ang PBA nga mapuno og mga tumatan-aw ang venue sa ilang mga duwa alang sa season-ending conference.

Nakadesisyon niini ang liga human gikanaog sa Alert Level 1 ang National Capital Region (NCR) Plus ug kasikbitang mga probinsya sugod kagahapon.

Hinuon ipatuman gihapon sa PBA ang ilang health and safety protocols lakip na niini ang pagpangayo og vaccination cards apil ang balidong government identification (IDs).

Natunong kining maong kalambuan sa gikaintapang panag-engkuwentro sa league-leaders Magnolia Ang Pambansang Manok Hotshots ug Meralco Bolts nga magpinaksitay sa main game karong alas 6:00 sa gabii.

Ang Hotshots kasamtangang naggunit sa solong liderato dala ang 7-1 nga rekord samtang sikit nga nagsunod kanila ang Bolts nga adunay 6-2 nga baraha.

Anaa man tuod sila sa ibabaw nga bahin apan nagkinahanglan gihapon ang Hotshots ug Bolts nga makadugang og kadaugan aron hingpit nga malansang ang top 2 spots nga adunay nagtangag nga twice-to-beat nga bintaha sa nagkaduol nga quarter-finals.

Sa premirong duwa, magtagbo ang NorthPort Batang Pier ug Blackwater Bossing karong alas 3:00 sa hapon.

Ang Batang Pier nagpatong sa ikasiyam nga dapit nga adunay 3-5 nga rekord samtang nangiwit ang Bossing nga wala pa’y daog sulod sa walo ka mga duwa.