NAKADESISYON si ALA fighter Donnie “Ahas” Nietes nga buhian ang iyang World Boxing Organization (WBO) super flyweight title sa pamasin nga makabaton og mas dakong away sa ugma damlag.

Ang WBO adunay mandato kang Nietes nga depensaan niya ang iyang korona sa usa ka rematch batok sa kababayang si Aston Palicte, kinsa maoy iyang mandatory challenger.

Apan alang kang Nietes, wala siya’y nakitang rason nga makig-away og balik kang Palicte. Ang premiro nilang away niadtong Septiyembre sa miaging tuig miresulta sa kontrobersyal nga panagtabla.

“After thinking hard about it for a long time, I have decided to vacate my WBO super flyweight belt. I feel in my heart that there is no point to do the rematch with Aston Palicte after the controversial draw,” opisyal nga pamahayag ni Nietes nga gipadangat sa media.

“I hope to seek bigger fights with the world champions of the other organizations. It may or may not happen but I believe this is the right decision under this situation.”

Gipasabot sa longest reigning Filipino world champion nga iya kining gibuhat aron mahatagan og kahigayunan si Palicte nga makaaway alang sa world title ug makahatag og dungog sa nasod.

Ang nagdumala sa 36 anyos nga si Nietes nga mao ang ALA Promotions nipadayag nga ilang gisuportahan ang ilang numero unong boksidor ning maong lakang.

“All I can say is that we at ALA Promotions will support whatever Donnie’s decision is. Support ra gyud mi ni Donnie. Si Donnie daghan na’g na-accomplish, so ang importante kon asa siya malipay, we will support him,” text message ni ALA Promotions president Michael Aldeguer ning mantalaan.

Ang ALA Promotions misuway unta paghan-ay og unification bout batok sa modaog sa World Boxing Council (WBC) super flyweight bout tali nila ni Thai Srisaket Sor Rungvisai batok Mexican Juan Francisco Estrada o batok kang World Boxing Association (WBA) super flyweight king Khalid Yafai apan wala kini mahitabo.

Sila si Rungvisai, Estrada ug Yafai mao ang labing sikat nga mga boksidor sa kalibutan sa super flyweight division. Tinguha ni Nietes nga iyang ikaharong bisan kinsa sa tulo sa umaabot.

Sa iyang bahin, si Palicte gilaumang makig-away sa nagsunod kaniya sa rating sa WBO nga mao ang kanhi kampiyon nga si Japanese Kazuto Ioka aron ilugan ang gibakante ni Nietes nga titulo.

Si Ioka maoy giilugan ni Nietes sa WBO super flyweight title niadtong Disyembre 31 pinaagi sa split decision nga kadaugan. (ESL)