Mga duwa karon: Nov 26, 2022

12:30 pm- UCLM batok CBSAA (High School)

2:00 pm- USP-F batok USC (High School)

3:30 pm- SHS-AdC batok UC (High School)

5:00 pm- UC batok USJ-R (College)

Ilugan sa University of Cebu (UC) Webmasters ug University of San Jose Recoletos (USJ-R) Jaguars ang No. 3 nga luna sa college division sa ilang panagharong sa main game karong hapon, Nobiyembre 26, 2022, sa Cebu Schools Athletic Foundation Inc. (CESAFI) basketball sa Cebu Coliseum.

Pareho na man tuod nakaseguro og luna sa semi-final round ang duha ka mga kampo apan mahinungdanon kining duwaa gumikan kay ang modaog makalikay sa usa ka grabe ka lisod nga tahas sa semis.

Sa semis, magparang ang No. 1 batok No. 4 ug No. 2 batok No. 3 diin adunay twice-to-beat nga bintaha ang top two teams.

Ang No. 1 naangkon sa gikahadlukang University of the Visayas (UV) Green Lancers, nga ninghuman sa double-round elimination bitbit ang 8-2 nga rekord.

Samtang ang No. 2 nakuha sa University of Southern Philippines Foundation (USPF) Panthers, nga ningtiklop sa elimination dala ang 7-3 nga baraha.

Ang Webmasters pormal nga nakasulod sa semis human nila gipangmakmak ang Cebu Institute of Technology-University (CITU) Wildcats, 95-77, niadtong Huwebes sa gabii, Nobiyembre 24, 2022.

Ang Webmasters kasamtangang naa sa ikatulo dala ang 5-4 nga rekord samtang naa sa ikaupat ang Jaguars nga adunay 4-5 nga baraha.

Puwede pa nga magkabaylo ang ilang puwesto depende sa resulta sa ilang panagsangka, nga maoy katapusan sa college division.

Sa high school division, magsangka sa premirong duwa ang league-leader City of City of Bogo Science and Arts Academy (CBSAA) Trail Blazers ug University of Cebu Lapu-Lapu Mandaue (UCLM).

Mosunod ang engkuwentro sa USPF Baby Panthers batok USC Baby Warriors dayon ang panagharong sa UC Baby Webmasters batok Sacred Heart School-Ateneo de Cebu (SHS-AdC) Magis Eagles.