Miposte og bag-ong personal best si Filipino pole vault Olympian EJ Obiena sa iyang pagsakmit sa ikaduhang puwesto sa Perche Elite Tour kagahapon, Marso 6, 2022 (RP time) sa Rouen, France.

Ang kontrobersyal nga atleta nakalimpyo og 5.91 meters aron buakon ang iyang 5.86 indoor pole record nga iyang narehistro sa Orlen Cup sa Poland niadtong 2021.

Igo ra man tuod nakaangkon si Obiena og silver medal sa Perche Elite Tour apan ang iyang naabot sa kompetisyon mas taas pa sa iyang nakab-ot dihang nakasakmit siya og gold medal sa Orlen Cup diin nakalimpyo siya og 5.81 meters niadtong Pebrero, 2022.

Ang training partner ni Obiena nga si Thiago Braz sa Brazil maoy miangkon sa bronze medal sa Perche Elite Tour.

Nakalimpyo sab si Braz og 5.91 meters apan iya kining nahimo sulod sa tulo ka mga pagsuway.