WALA pa man tuod klaro nga madayon ang rematch nila ni American Floyd Mayweather Jr. ug Filipino Manny Pacquiao apan nagpagawas na’g prediksyon ang bantugang boxing promoter nga si Bob Arum kon mahitabo ang away – modaog si Pacquiao.

Sa premirong away niadtong 2015, si Mayweather mirehistro og unanimous decision nga kadaugan apan gibutyag ni Pacquiao human sa away nga naangol ang iyang tuo nga abaga sa 4th round niadtong higayuna hinungdan nga wala kini niya nagamit og insakto.

Si Pacquiao nipadayag sa iyang tinguha nga gusto niyang ikaharong og balik si Mayweather apan gipakita sa naulahi nga wala siya’y interes niini.

Human sa impresibong gipakita ni Pacquiao sa iyang split decision nga kadaugan batok kang Keith Thurman niadtong Hulyo 20, mas ningkusog ang mga hisgot-hisgot kabahin sa rematch.

Unya dili pa lang dugay, nagbinatoay og mainit nga mga pulong ang duha ka mga boksidor nga gituohang usa ka taktika aron madugangan ang kahinam sa mga tawo kabahin sa rematch.

Alang kang Arum, maayo kini alang sa pamatigayon nga aspeto.

“If that fight happens, then it’s probably worth it to do, because that would be a big, big, big fight,” asoy ni Arum sa interbyu sa Fighthub. “Manny Pacquiao would win now.”

Alang kang Arum, angayan na nga moretiro ang 40 anyos nga si Pacquiao kon dili madayon ang ilang panagharong og balik ni Mayweather. (ESL)