GISUGDAN na ni World Boxing Associaton (WBA) welterweight champion Manny Pacquiao ang pag-train sa iyang anak nga si Jimuel.

Ang asawa ni Pacquiao nga si Jinkee nag-post og video sa usa sa training sessions sa iyang bana ug anak ug matod niya nga nakahilak na siyang daan nga nagsud-ong niini.

Ang eight-division world champion mitudlo kang Jimuel og footwork, depensa, paglikay, ug kumbinasyon sa mga kumo.

Gipangunayan ni Pacquiao ang pagtudlo kang Jimuel hasta ang pagtaod sa hand wrap.

Dili pa lang dugay, si Jimuel nakig-away kang Lucas Carson sa usa ka amateur style exhibition match.

Sa sayo pa, dakong supak ang magtiayong Pacquiao sa plano sa ilang kamaguwangan nga anak. Apan tungod sa pagpursige’g hangyo ni Jimuel, hayan natugtan ra kini sa iyang ginikanan. (ESL)