ANG chief trainer ni WBA welterweight champion Manny Pacquiao nga si Buboy Fernandez masaligon nga ang fighting senator anaa na sa 60 porsiyento nga prepararado alang sa iyang unification showdown batok ni super WBA titlist Keith Thurman nga gikatakda sa MGM Grand Garden Arena sa Las Vegas karong Hulyo 20.

Si Pacquiao padayon nga nag-ensayo karon didto sa Elorde Gym nga haduol ra sa Mall of Asia Arena diin atoa ra usab didto ang iyang buhatan.

Gipasabot ni Fernandez nga dili sila gusto nga masubraan si Pacquiao sa iyang training sanglit aduna pa silay unom ka semana.

Iyang gitug-an nga nagtuo siya nga nasubrahan ang eight-time division world champion sa training niadtong iyang away batok ni Jeff Horn didto sa Australia diin kini nasugamak sa kontrobersiyal nga kapildihan.

Hinuon batok ni Lucas Matthyssee ug Adrien Broner, haom ug sakto ang desinyo sa ilang training ug igo ra kaayon sa preparasyon niini.

Ilang gipasabot nga dili na sama kaniadto ang training nga ilang gipasunod karon ni Pacquiao sanglit ila usab nga gikonsiderar ang edad niini nga 40 anyos na.

Si Justine Fortune, ang conditioning coach ni Pacquiao mga magpabilin ang training ni Pacquiao sa Manila hangtod nga mobiya kini paingon sa Los Angeles karong Hunyo 17 diin didto ipadayon ang iyang ensayo.

Sugod sa niaging semana, ang sparring session ni Pacquiao ipahigayon matag Martes, Huwebes ug Sabado.

Ang asst. trainer nga si Jonathan Penalosa ang mihan-ay og pito ka mga tag-as nga sparring partner alang ni Pacquiao. (JBM)