NAGKAUBAN na’g balik ang duha ka All-Stars nga sila si Kawhi Leonard ug Kyle Lowry sa labing unang higayon human sa usa ka buwan apan si Serge Ibaka ang nakamugna sa labing importanteng puntos nga nagpadaog sa host Toronto Raptors batok sa Atlanta Hawks, 104-101, kagahapon sa National Basketball Association (NBA).

Si Ibaka nakahansak sa nahabiling 17 segundos nga maoy nakahatag sa Raptors og 102-101 nga labaw.

Sa return play, pakyas ang Hawks pagmugna og puntos nga nakapaseguro sa kadaugan sa Raptors.

Ang laing hansak ni OG Anunoby sa nahabiling 0.7 segundos maoy nagtali sa final score.

“We pulled one out,” matod ni Raptors coach Nick Nurse. “We were trying to get away from them and never really could.”

Sama sa naandan, gipangulohan ni Leonard ang Raptors pinaagi sa iyang 31 puntos, nidugang og 16 puntos si Lowry, niamot og 14 puntos si Anunoby samtang ningtampo og 13 puntos matag usa sila si Ibaka ug Pascal Siakam.

Mao kini ang labing unang higayon nga nagkadungan og duwa sila si Leonard ug Lowry gikan sa kapildihan sa Raptors batok sa Milwaukee Bucks niadtong Disyembre 9.

Ang Raptors ningpahugot sa ilang paggunit sa overall leadership dala ang 31-12 nga rekord, 16-6 niini ang mga duwa nga parehong naa sila si Leonard ug Lowry.

Ang Hawks, nga nahagsa sa 12-28 nga rekord, gipangulohan ni John Collins pinaagi sa iyang 21 puntos ug 14 rebounds, nidugang og 20 puntos si Jeremy Lin samtang niamot og 19 puntos si Trae Young.

Ning sangkaa, ang Hawks nakamugna og 27 ka turnovers nga maoy labing ngil-ad ning maong season.

Sa turnovers sa Hawks, ang Raptors nakahimo og 34 puntos.

“If we keep it under 20, the result is a little different,” matod sa usa sa mga sinaligan sa Atlanta nga si Vince Carter kabahin sa ilang tournovers.

Grabe ka sikit ang engkuwentro sa duha ka mga kampo hilabi na sa 4th quarter diin wala bisan usa ang nakalabaw og kapin sa lima ka mga puntos. AP