Gianunsiyo ni Kiefer Ravena sa iyang Instagram account nga ang kombati sa Hanoi, Vietnam maoy katapusan niyang pagduwa sa Southeast Asian Games.

“My last SEA Games,” tipik sa post ni Ravena.

Niadto pang 2011 nagsugod si Ravena pagrepresentar sa Pilipinas sa matag duha ka mga tuig nga kompetisiyon. Niadtong higayuna, nag-edad pa lang siya og 18.

“That’s it for me! Been my absolute pleasure playing for the Philippines,” dugang ni Ravena.

Adunay sagol pait ang pagpanamilit ni Ravena sa kompetisyon tungod kay napakyas ang Gilas pagsakmit sa gold medal human kini gipakaging sa Indonesia, 85-81, sa inilugay og bulawan.

Mao kini ang labing unang higayon nga wala nakalabni og gold medal ang Pilipinas sa men’s basketball sa SEAG gikan niadtong 1989.

Hinuon, dili na sab gyud bastabasta ang puwersa sa Indonesia hilabi na kay aduna kini tulo ka dekalidad nga naturalized players.

Sa kinatibuk-an, si Ravena nakahipos og lima ka gold medals ug usa ka silver sa SEA Games.