NAGKAWAGTANG na man tuod ang ‘mahika’ ni Efren “Bata” Reyes apan nagpabilin ang hiyas nga nagpahimo kaniyang labing bantugan nga bilyarista sa tibuok kalibutan.

Bisan sa edad nga 65, si Reyes usa lang gihapon sa pambato sa Philippine billiards ug nakita kini sa miaging 30th Southeast Asian Games.

Ang gitawag og Magician miangkon nga apektado na ang iyang duwa sa iyang panan-aw gumikan sa iyang pangidaron apan bisan pa niini, nakakuha gihapon og bronze medal si Reyes sa men’s carom (1-cushion) sa SEAG.

Sa ka taas sa iyang naabot nga gibuwakan og dili na maihap nga mga kalampusan, siya pasidunggan og Lifetime Achievement Award sa Philippine Sportswriters Association (PSA) Awards Night karong Marso 6 sa Centennial Hall sa Manila Hotel.

Si Reyes, kinsa napiling PSA Athlete of the Year niadtong 1999, 2001 ug 2006, mao sab ang gipiling special guest speaker sa kalihukan. (ESL)