GILAUMANG makalangkat og labing minos, upat ka gold medals Pinoyng mga bilyarista nga manumbol sa 30th Southeast Asian Games nga ipahigayon sa Pilipinas sugod karong Nobiyembre 30.

Mao kini ang panahom nga buhian ni Billiards and Snookers Congress of the Philippines secretary general Robert Mananquil.

Nagkanayon si Manangquil nga taas ang moral sa ilang mga batos nga malabwan ang nahakot niining mga medalya sa 2017 nga edisyon nga gipahigayon sa Kuala Lumpur, Malaysia.

Sa Malaysia, ang Pinoyng mga bilyarista nakalabni og duha ka gold medals, usa ka silver medal ug duha ka bronze medals.

Nidugang si Mananquil nga lig-on nga puwersa ang ilang giporma ning higayuna sa matag duha ka mga tuig nga kompetisyon.

Lakip sa mga naglangkob sa national team mao sila si World No. 3 Rubilen Amit, World No. 4 Carlo Biado, Dennis Orcollo, Johann Chua, Jeffrey Ignacio, Warren Kiamco, Chezka Centeno, Iris Rañola ug Floriza Andal.

Nagtuo si Mananquil nga kining maong grupo yano ra nga makahakot og upat ka mga medalya sa men/women’s 9-ball competition ug men/women’s 10-ball event.

“That’s four gold medals already,” dugang ni Mananquil. “We still have 9-ball and 10-ball doubles where we also have fighting chances. Of course, I can’t promise that we would also win the gold there, but if luck rolls our way, we might sweep all pool events and win six out of the 10 gold medals at stake.”

Mopakita og aksyon sa snookers mao sila si Alvin Barbero, Michael Angelo Mengorio, Jeffrey Roda ug Basil Al-Shajjar samtang sila si Benjie Guevarra ug Luis Saberdo ang morepresentar sa nasod alang sa English Billiards.

Si billiard legend Efren “Bata” Reyes moduwa sab kauban si Francisco Dela Cruz sa carom.

“What we have is a very stacked and solid lineup,” pagtino ni Mananquil.

Si Philippine Sports Commission (PSC) Chairman William Ramirez mipoadayag sa iyang kinatibuk-ang suporta sa tanang mga atelta sa Pilipinas. (PR)