Ilugan nila ni kanhi world minimumweigtht champion Vic Saludar ug Ariston Aton ang Asian Boxing Federation (ABF) minimumweight title sa main event sa “Rumble in Naga” boxing promotion nga gikatakda karong Disyembre 21, 2022 sa Enan Chiong Activity Center sa City of Naga, Cebu.

Si Saludar, 32, kinsa natawo sa Polomolok, South Cotabato apan nagpuyo na sa Cagayan de Oro City, naggunit og 21-6, 11KOs nga rekord samtang si Aton, 22, adunay 9-5, 5KOs nga baraha.

Ang promosyon hiniusang gipasiugdahan sa local government sa City of Naga, Championship Development Boxing of the Philippines, Prime Stag Sports Promotions, ug Butlig Promotions.

Sa undercard, magsangka sila si Speedy Boy Acope batok Jhonrey Lauza Domingag, Michael Adolfo batok Anthony Galigao, Johnro Taneo batok Marlon Alejandro, Jeson Mopon batok Grant Elorza.

Mag-away sab sila si Cherwellan Cantel batok Mark Anthony Rotilles, Jakeson Saludar batok Jimpaul Dignos, Raffie Jamero batok Joebert Dacullo, George Sedilio batok Dondi Lariosa Janonillo, ug Keir Toregosa batok Henry Flor.