MOABOT ngadto sa 70 ka mga lokal ug international nga mga tirador sa nasod ang magka-engkuwentro karong adlawa sa dihang sugdan na ang Sargo sa Cebu City Open 10-Ball Open tournament sa The Atrium, Robinson’s Gallera.

Ang kompetisyon nga gipresentar sa MP Promotions ug gisuportahan sa local government unit sa Cebu City nagtangag og kapin sa usa ka milyon ka pesos nga ganting salapi.

Ang kampiyon makabulsa og P300,000 samtang ang runner-up mouli nga may P200,000. Aduna usay gihan-ay nga tag P80,000 matag usa ang second ug third runners-up.

Si Elman “Aries” Sacayanan sa MP Promotions, sa press conference nga gipahigayon kagahapon sa Robinson’s Gallera, mibutyag nga kon maglampuson, hayan anhi gihapon kini nila himuon sa sunod higayon.

Iyang gipasalig nga kon adunay mga pribadong kompaniya nga moitsa sa ilang suporta, hayan mapadak-an pa nila ang premyo niini.

Ang Sugboanong si Warren Kiamco, usa sa mga inilang bilyarista sa nasod, miingon nga ang maong event makapabalik og alegre sa billiards dinhi sa Sugbo.

Iyang giangkon nga sulod na sa 10 ka tuig nga walay mga dagkong tournament sa billiard ang napahigayon sa tibuok nasod.

Si Cebu City Mayor Edgardo Labella mipadayag usab nga ang dakbayan andam moitsa sa siyento-por-siyento nga suporta sa maong event diin iyang giingon nga kini maoy sport nga maka-produce ang mga Pinoy athletes og mga champions.

“This sport can produce champions and it has been proven by our national players. I hope there will be many billiard tournaments here. On my part and on behalf of the city, I will be very supportive,” matod sa mayor. (RSC, JBM)