Gihulagway sa batan-on nga higanteng Pinoy nga si Kai Sotto nga “binuang” ang lakang sa Samahang Basketbol ng Pilipinas (SBP) nga pagpugong ni William Navarro nga makaduwa sa Seoul Thunders sa Korean Basketball League (KBL).

Sa iyang Instagram story ug Twitter account, nagkanayon si Sotto nga kinahanglan kining maundang tungod kay nagtangtang kini sa kagawasan sa usa ka magduduwa nga mopili sa dalan nga iyang pagasubayon.

“I’m sorry but this is crazy. THIS HAS TO STOP,” matod ni Sotto, kinsa kauban ni Navarro sa Gilas Pilipinas sulod na ubay-ubay nga international tournaments.

“You got players who’ve been working hard and dreaming to play basketball at the highest level they can reach and we got our own people stopping us from achieving our greatness.”

Gipasabot ni Sotto nga kon buot hunahunaon, angayan untang tabangan sa SBP si Navarro sa pagtuman sa tinguha niini.

“At the end of the day, one’s success is ‘everyone’s.’ So we have to help each other go up! Not down,” dugang ni Sotto, kinsa nagduwa sa Adelaide 36ers sa National Basketball League (NBL) sa Australia.

Gitataw sa SBP nga morespeto sila sa desisyon sa usa ka magduduwa apan wala nila tugti si Navarro nga makaduwa sa KBL gumikan kay aduna pa kini buhing kontrata sa Gilas Pilipinas.

“The SBP respects players’ rights to look for greener pastures. But players also need to respect agreements they have entered into with their teams,” opisyal nga pamahayag sa SBP nga napatik sa gmanews.tv.

Naa sab sa kontrata ni Navarro nga inig human sa iyang obligasyon sa national team, moduwa siya sa NorthPort Batang Pier nga maoy nag-draft kaniya sa Philippine Basketball Association (PBA).