GIPAKAGING sa Cebu City Sharks ang mas inilog nga Manila Stars Frontrow pinaagi sa overtime, 91-86, niadtong Sabado sa gabii sa Maharlika Pilipinas Basketball League (MPBL) Lakan Cup sa San Andres gym.

Sama sa naandan, gipangulohan na sab ni Patrick Cabahug ang Sharks pinaagi sa iyang 27 puntos samtang nidugang og 19 puntos ug 14 rebounds si William Bill McAloney.

Ang Sharks ug Stars pareho na karong naggunit og 2-1 nga rekord.

Sa kapildihan sa Sharks, ang Makati Super Crunch (2-0), San Juan Knights Go for Gold (2-0), Basilan Steels Jumbo Plastic (2-0), Batangas City Athletics Tanduay (1-0), ug Iloilo United Royals (1-0) mao na lang ang teams nga wala pa’y pilde.

Unang nanginit ang opensa sa Stars ug nakaposte kini’g 15 puntos nga labaw, 30-15, paghuman sa 1st quarter.

Padayong kontrolado sa Stars ang duwa ug naglabaw lang gihapon sila pagkahuman sa 3rd quarter, 59-53.

Sa 4th quarter, hinayhinay nga ninggukod ang Sharks hangtod natilawan nila ang ilang labing unang labaw sa duwa, 65-64, sa nahabiling 5:37 minutos.

Grabe ka sikit ang duwa human niini ug napugos ang overtime.

Nagkumboya ang starters sa Sharks pinangulohan ni Cabahug aron pagposte og 87-81 nga labaw sa nahabiling 1:04 minutos sa overtime nga maoy nag-abli og dako sa ilang pultahan paingon sa kadaugan. (ESL)