SA pagpangulo sa Sugbuanong si Mark Jayvenn Tallo, ang NLEX Road Warriors nakakombati unta og insakto apan nahutdan kini sa lahutay ug nasugamak sa 63-75 nga kapildihan batok sa Guangzhou Long Lions sa semi-finals sa 2018 Asia League Super 8 sa miaging gabii sa Macao East Asian Games Dome sa Macau.

Gimugna ni Shirelijian Muxtar sa 4th quarter ang pito sa iyang kinatibuk-ang 21 puntos aron pakgangon ang hudlat sa Road Warriors sa duwa.

Sayong nanginit ang opensa sa Long Lions ug nakamugna kini’g 18 puntos nga labaw sa halftime, 39-21.

Si Tallo, kinsa produkto sa Phinma-Southwestern University (SWU) Cobras midugkat og dakong rally sa Road Warriors nga nagpahak sa labaw sa Long Lions ngadto sa duha na lang ka mga puntos, 48-46, sa 3rd quarter.

Apan sa 4th quarter, napukaw sa Long Lions ang kabangis sa ilang opensa aron inaton pagbalik ang ilang labaw deretso na paingon sa 12 ka puntos nga kadaugan.

Gipangulohan ni Tallo ang kadaugan pinaagi sa iyang 16 puntos samtang niamot og walo ka mga puntos ang beteranong si Cyrus Baguio. (ESL)