Nagpakatap og 33 puntos si Stephen Curry aron aswaton ang Golden State Warriors batok Phoenix Suns, 116-107, sa kulbahinam nga Western Conference matchup kagahapon didto sa Phoenix, Arizona.

Ang panagsangka sa duha ka teams maoy giatngan sa National Basketball Association (NBA) fans tungod kay ang Golden State ug Phoenix maoy top two teams karon sa NBA regular season.

Mipakita si Curry sa iyang katakos aron dalhon ang iyang team sa kadaogan ug makuha ang liderato sa NBA team standings bitbit ang 27-6 nga baraha.

Ang Warriors naabot sa balwarte sa Suns nga wala ang tulo sa ilang top four scorers tungod sa health ug safety protocols nga gitakda sa liga. Wala makaduwa si Andrew Wiggins, Damion Lee ug Jordan Poole.

Sa pagkawala sa ilang mga pambato, giaswat ni Curry ang scoring load alang sa team, swerte pud kay nakakuha siya og dakong tabang gikan ni Otto Porter Jr. sa uwahing bahin sa duwa.

Si Porter adunay utso puntos, siyam ka rebounds, tulo ka blocks, tulo ka assists ug usa ka steal. Ang pinakadako niya nga ambag mao ang step-back trey ug duha ka jumpers sa uwahing bahin sa duwa.

Batbat ni Warriors coach Steve Kerr nga iyang giplano ang mga plays alang kay Porter. Dugang niya nga dako ang natabang ni Porter sa puntos, rebounds ug sa depensa.

Ang point guard sa Phoenix nga si Chris Paul mimugna og 21 puntos, otso ka assists, apan ang leading scorer sa Suns nga si Devin Booker nalimitahan ngadto sa 13 puntos sa 5-of-19 shooting.

Si Deandre Ayton midunol og 18 puntos samtang si Mikal Bridges miamot og 17.

Giangkon ni Suns coach Monty Williams nga mas maayo nga nakaduwa ang Warriors aning duwaa.

“They created those breaks. They played harder than us,” Suns coach sigon niya. “It’s rare when I say that about our team. They outworked us more consistently for 50-50 balls, timely offensive rebounds, diving out of bounds to save balls.”