Kinahanglang magpabakuna batok sa COVID-19 ang tanang mga atleta nga mokombati sa 31st Southeast Asian Games nga ipahigayon sa Hanoi, Vietnam sa ulahing bahin ning tuig.

Ang Vietnam SEA Games Organizing Committee mianunsyo nga ilahang ipatuman ang “no vaccine, no participation” nga lagda atol sa online SEA Games Federation meeting niadtong Martes, Mayo 18, 2021 nga gitambungan ni Philippine Olympic Committee president Abraham “Bambol” Tolentino.

Gibutyag ni Tolentino nga mipasalig ang mga nagpasiugda nga mahinayon ang kompetisyon taliwala sa padayong hulga sa pandemya.

Ang kompetisyon sugdan karong Nobiyembre 21, 2021 ug mahuman sa Disyembre 2, 2021.

“Their policy (no vaccine, no participation policy) is for the good of everyone,” pamahayag ni Tolentino.

“Most of the athletes from our Southeast Asian counterparts are already vaccinated and we’re the only country that is left behind. But we already wrote the IATF to prioritize the SEA Games-bound delegates. We’re ready to take any vaccine [brand].”(ESL)