BISAN kulatado siya sa ikaduha nilang away, si Deontay Wilder nagtinguha gihapon nga makig-away og balik kang Tyson Fury sa ikatulong higayon.

Si Wilder, kinsa nasugamak sa 7th round TKO nga kapildihan sa ilang World Boxing Council (WBC) heavyweight title bout ni Fury niadtong Dominggo sa Las Vegas, nibutyag nga iyang gamiton ang rematch clause alang sa ilang trilogy.

Gipasabot sa Ameikanong si Wilder nga posibleng mokuha siya og bag-ong assistant trainer aron ihulip kang Mark Breland, kinsa maoy nag-itsa og puti nga tualya niadtong Dominggo.

“I’ve told them many times that if anyone throws the towel in on me, there will be consequences,” pasabot ni Wilder sa interbyu sa The Athletic.

Daghan ang nagsuporta nga sakto ang desisyon ni Breland apan alang kang Wilder, mas ipalabi niyang makabsan og kinabuhi ibabaw sa ring kaysa sa mosurender sa away.

Kaduha natumba si Wilder sa maong away, usa sa 3rd round ug usa sab sa 5th round, una milabay og puti nga tualya si Breland.

Gipasabot ni Wilder nga usa sa nakaapekto sa iyang away niadtong higayuna mao ang 40-pound costume nga iyang gisul-ob dihang nagpaingon siya sa ring. Gumikan niini, matod ni Wilder, nahago na ang iyang mga tiil sa wala pa nagsugod ang away. (ESL)