ANDAM na ang tanan alang sa tinuig nga summer clinic sa Yaw-Yan ArDigma Cebu nga magsugod karong Abril 1 sa 4th floor sa Coast Pacific Dowtown Center atbang sa University of Cebu main campus sa dalan Sanciangko, dakbayan sa Sugbo.

“Alegre ug exciting na sab nga nga training camp. Nag-expect ta nga naay daghang mga bata ug teenager nga mangapil nato especially nga nag-offer ta og mixed martial arts classes,” asoy ni Yaw-Yan ArDigma Cebu founder Master Benigno ‘Ekin’ Caniga Jr.

Gikonsiderar nga maoy MMA pioneer club sa rehiyon, ang Yaw-Yan Ardigma nakaumol na og daghang dekalidad ug professional fighters sama na lang ni Roel ‘Akiyama’ Rosauro, kinsa sulod na sa sab sa duha ka mga higayon nga nakaaway sa One Championship.

Gani ning bag-uhay lang, gibutyag ni Master Ekin nga usa sa iyang fighters nga si Allan Albindo nahilakip na sa One World Series, usa ka farm tournament sa ONE Championship.

“Ang atoa gyud nga goal kay maka-develop og Cebuano fighters nga mo-excell sa international stage. Pinaagi aning summer clinic, hopefully makakita ta og potential fighters,” matod ni Master Ekin.

Kasamtangang nagpadayon ang rehistrasyon alang sa clinic sa Yaw-Yan ArDigma gym. Alang sa dugang mga impormasyon, mahimong motawag sa 0943-6568900. (ESL)