NAPILI ang fighter sa Yaw-Yan Ardigma Cebu nga si Allan Albindo nga usa sa mga Pinoy nga paawayon sa umaabot nga promosyon sa ONE Warrior Series (OWS) sa Singapore.

Mismong si MMA legend ug kasamtangang ONE Championship vice-president Rich Franklin ang mipili kang Albindo aron hatagan og kahigayunan nga makaaway sa ONE Championship developmental league.

Gipasabot ni Franklin nga ang kaisog, dedikasyon ug kahinam ni Albindo maoy nakita niyang mga rason kon nganong iya kining napilian.

“I went hiking through the canyons at Kawasan Falls. When we stepped up to the 15-meter fall, he jumped with excitement, no hesitation. He approaches competition the same way,” matod ni Franklin, kanhi UFC middleweight champion, sa interbyu sa Sun.Star Cebu.

Sa miaging semana, si Franklin mianhi sa Sugbo aron personal nga makigkita kang Albindo ug sa samang higayon, nagkuha sab kini og video kabahin sa OWS.

Niadtong Dominggo, gipaambit sab ni Franklin ang iyang nakamahuan sa MMA ngadto sa mga batan-on nga nag-training sa Yaw-Yan gym sa dalan Sanciangko, dakbayan sa Sugbo.

Nagtuo si Franklin nga ang Filipino fighters mas taas na og nakamahuan kumpara sa mga kaatbang niini sa mga nasod sa Southeast Asia.

“Filipino athletes are ahead of their competition in the Southeast Asia for two reasons. First, the Philippines was exposed to Mixed Martial Arts years before other countries in the region were,” dugang ni Franklin.

“As such, the athletes here have been able to study arts like wrestling and jiu-jitsu longer and figure out how to incorporate them into their already existing stand-up art.”

Sa pagpakighinabi ning mantalaan, ang founder sa Yaw-Yan Cebu Ardigma nga si Master Benigno “Ekin” Caniga nagkanayon nga dako ang iyang pagsalig kang Albindo.

“Salig ko ani niya kay desiplinado kaayo sa training. Hinuon dili gyud ta makaseguro kay maayo sab biya ang fighters sa ubang countries,” asoy ni Master Ekin.

“Basta hard training lang gyud. Di man ta maka-expect nga 100 percent modaog si Albindo pero daghan mi nga motabang niya sa iyang training.”

Si Albindo, 22, kinsa lumad nga taga Argao, Cebu, naggunit og limpiyong 7-0 nga rekord sa amateur level. Wala sab siya’y pilde sulod sa upat ka mga away sa muay thai ug kickboxing.

Gipasabot ni Master Ekin nga wala pa sila nasayod sa kinatibuk-ang mga detalye sa umaabot nga dakong away ni Albindo ug naghuwat pa siya nga moabot ang kontrata sa sunod semana.

“Basin mga May or June na ni iyang away kay lisod na man kon sa April,” pasabot ni Master Ekin. (ESL)