Gitunol ni world champion gymnast Carlos Edriel Yulo ang ika-15 nga gold medal sa Pilipinas pinaagi sa pagpanghawod sa floor exercise sa 31st Southeast Asian Games kagahapon, Mayo 15, 2022 sa Quan Ngua Sports Palace sa Hanoi, Vietnam.

Mirehistro si Yulo og 15.200 puntos aron dominahon ang iyang paboritong event sa gymnastics competition.

Kini maoy ikaduhang gold medal nga nakuha ni Yulo ning matag duha ka mga tuig nga kompetisyon.

Midaog na siya sa individual all-around event.

Sama ni Yulo, ang laing atleta sa Pilipinas nga si Kim Mangrobang nakabira sab sa iyang ikaduhang gold medal kagahapon human niya gipatigbabawan ang women’s individual duathlon event.

Ang premirong gold medal ni Mangrobang nagagikan sa triathlon competition.

Si Agatha Wong nakahatag sab og gold medal sa Pilipinas kagahapon human niya nadepensaan ang iyang titulo sa wushu women’s taolu taijijian event.