DILI mominos 126,267 ka mga bata nga na-enroll sa nagkalainlaing children development centers (CDC) sa Central Visayas (CV) ang gipakaon sa Department of Social Welfare and Development (DSWD) uban sa pag-abag sa local government units (LGUs) niadtong 2019.

Ang DSWD Field Office 7 mipatuman sa Cycle 9 sa Supplementary Feeding Program (SFP).

Ang programa gitumong sa pagpalambo ug pagpasustiner sa nutritional status sa kabataan sa LGU-managed day care centers/supervised neighborhood play (SNP) sa ilang dapit ug komunidad.

Ang food supplementation program naghatag og init nga pagkaon atol sa snack/meal time sa mga bata sulod sa lima ka mga adlaw sa usa ka semana ug 120 ka adlaw na dugang sa ilang regular nga pagkaon.

Ang SFP nagsilbi sa mga bata nga ang timbang sa pagsugod sa feeding ug 60 ka adlaw ug pagtapos sa 120 feeding days sa pagdeterminar sa kalamboan ug ilang nutritional status.

Ang mga bata nga na-edad og 2-4 ubos sa SNP group, 3 sa 4-anyos nga bata sa child development centers ug 5-anyos nga bata nga na- enroll sa Department of Education (DepEd) pre-school apan naa sa day care centers ang target beneficiaries programs.

Sa pagpatuman sa cycle 9 sa SFP sa region-7, dunay kinatibuk-an nga P210,702,600 ang gigahin alang sa 3,497 ka child development centers (CDC) ug supervised neighborhood play (SNP) groups sa Cebu, Bohol, Negros Oriental ug Siquijor.

Gawas sa supplemental food, dunay complementary activities sama sa deworming, micronutrient supplementation, nutrition education, ug growth monitoring ang gihimo sa hingpit nga sinati sa resulta sa SFP.

Sa 9th cycle, serye sa orientation sa guidelines sa operation sa SFP sa nagkalainlaing LGUs sa upat ka mga lalawigan sa CV ang gihimo sayo sa 2019 sa pagseguro sa kalamposan sa programa. (PR)