ANG panahon nag-agad lang sa dis-og

Sa mga gutling ngadto sa mga gutlo,

Sa mga gutlo ngadto sa mga takna

Nga dali da nga mahimong adlaw.

Ang mga panid sa akong panumdoman

Nahapnig sama sa mga pahina sa libro

Nagsunod ang mga panghitabo

Sa kinabuhi sa akong pagka tawo.

Mga kaagi sa akong kagahapon

Kanus-a nasinati ang kapakyas

Sa unang gugma ug buot na lamang

Itugyan ang kinabuhi sa lubnganan.

Mga kaagi sa tumang mga pag-antos

Ug pakigbisog aron ang nagkaawop

Nga diwa sa kinabuhi madagkutan

Sa dinagaang sa nagpahiping paglaom.

Sa mga panid sa akong panumdoman

Nahitala ang gahom sa akong salabutan.

Napunpon sa kinauyokan ning galamhan

Ang kalig-on sa kasingkasing ug dughan.