KON sa panultion pa, “it takes a village to raise a child,” kini ang nasinati sa magtiayong PJ ug Diane Higida-Patricio sa pagpadako sa ilang usa ka tuig nga anak.

Si Diane nipaambit nga isip usa ka first time nga inahan, daghan siya og nadawat nga tabang gikan sa iyang mga ginikanan ug mga kabanay sa pag-amuma ug pagpadako sa ilang bugtong anak nga si Ethan Xavier “Xavi” Patricio.

Daghan usab siya og nadawat nga tips gikan sa iyang mga higala nga mga inahan na, kon unsaon ang pag-atiman sa bata.

“Pinaka challenging part for the 1st year of raising Xavi kay kana jung magkasakit siya. Ma-rattle jud ko kon hilantan siya or ma-unwell,” asoy sa 33 anyos nga inahan.

Si Xavi ang bugtong anak sa magtiayong Patricio.

Ang bata mao usab ang bugtong apo sa mga ginikanan ni Diane nga sila si Catalino Higida, 64, ug Jocelyn Higida, 62. Wa pay anak ang manghod nga babaye ni Diane.

Si Catalino, usa ka maestro sa Cebu Technological University (CTU)- Argao campus samtang pharmacist si Jocelyn sa Isidro C. Kintanar Memorial Hospital sa Argao. Niadtong Mayo 7, gisaulog sa pamilya ang unang kasumaran sa adlaw nga natawhan ni Xavi sa Kalumpang Beach Resort sa lungsod sa Argao, habagatang Sugbo.

Ang tema sa birthday party kay kabahin sa salida nga “Cars” diin ang Jollibee maoy nagpahimutang ug nagdala sa programa.

Sa wala pa magsugod ang party, gipanalanginan una ni Padre Ruben Bajenting si Xavi. Ang maong pari mao usab ang nagbunyag sa bata ug nagkasal nila ni Diane ug PJ.

Gawas nga birthday, matod ni Diane, gisaulog usab nila sa maong adlaw ang pagdako sa ilang anak sa unang 12 ka buwan ug ang pagka espesyal niini sa ilang kinabuhi ug pamilya.

“Mo-grow siya with values and wisdom, good boy and healthy,” ang wish ni Diane alang kang Xavi sa birthday niini.

Samtang si PJ nanghinaot nga mahimong intelihente ug baskug kanunay ang anak. (SCG)