ANG matag sugilanon dunay sinugdanan.

Dunay mubo, dunay tag-as nga sama og nobela. Ang among estorya sama og nobela nga padayon pang gisuwat. Kon tinud-anay pa nga libro, baga na tingali kaayo. Kon matag tuig usa ka kapitolo, niabot na ni og 25.

Tangkod 25 ka tuig na sa among pagsinaaray: sa kalipay ug kasakit, sa kakabus ug kaadunahan, niadtong Mayo 21.

Wa na ko makahinumdom sa una namong panagtagbo ni Chelo, apan siya wa makalimot niadto kay naglagot siya sa akong komentaryo bahin nila dihang intern pa siya Mass Communications sa University of San Jose Recolletos (USJ-R) sa sibyaanang dyRC, diin kanhi usa ako ka deskman.

Apan ang akong nahinumdoman, akong gitagna nga ang akong mamahimong kapikas sa kinabuhi akong ikahinagbo sa dyRC samtang ako galakaw alang sa scheduled interview usa ka hapon niana. Mga usa ka tuig kapin ang nilabay, ang akong tagna natinuod.

NAGKATAGBO

Kay molargahay og Estados Unidos ang among babayeng news director ug newscaster sa among morning newscast, nangita ang management og makapuli nga dunay maanindot nga tingog ug maayo og news delivery.

Ilang nahisgutan ang usa ka kanhi babayeng intern sa USJ-R. Nangutana ko kon gwapa ba. Naay nisulti nga gwapa. Ako sang gitubag nga manguyab ko. Giingnan kong naa nay boyfriend. Ako sab nga gitubag nga “mailog man gani ang kapito pakasli, uyab pa ba?” Nahitabo gyud.

Samtang si Chelo newscaster ug anchor, maatol usab nga ako ang tigsuwat sa mga balita nga iyang basahon on air.

Nag-obserbar ko sa iyang personalidad ug batasan una ko nipadayag sa akong gibati ngadto niya. Wa dayon ko sugta kay naa kuno siyay boyfriend, apan nangutana siya kon makahuwat ba ko.

Ako siyang gitangdo kay she is worth the wait. Nagbunga ang akong paghuwat og pipila ka buwan, iya kong gisugot.

Ang labing dakong kalisdanan nga among giatubang mao ang kamatayon sa among ikaduhang babayeng anak nga si Mary Heart sa sakit nga dengue hemorrhagic fever niadtong Septiyembre 14, 2009. Di lalim ang amoang giagian sa nakalabay nga 25 ka mga tuig. Di sayon ang pag-atiman ug pagbuhi sa pito ka mga anak. (REV)