Martin: Unsay tsansa ni Rabiya Mateo?
Tua na sa Amerika ang pambato sa Pilipinas sa Miss Universe 2020 nga si Rabiya Mateo nga ipahigayon karong Mayo 16 sa Florida.
Sayo silang nilarga tungod sa mga health protocol nga gipatuman. Apan ang dakong hagit karon ni Rabiya mao ang iyang mental health tungod sa pressure labi na sa social media. Di kalikayan nga makumparar siya nilang Catriona Gray ug Pia Wurtzbach.
Way duda nga guwapa sad si Rabiya apan base sa akong nakit-an sa mga interbyu niya morag di kaayo siya confident manubag ug klarong kuwang sa height kon itandi sa mga nangaging kandidata sa Pilipinas sa Miss U. Ang gibutang sa iyang biodata kay 5’7”. Kana tingali kon mag-heels siya.
Kon mangutana mo unsay tsansa ni Rabiya? Sa akong ubos nga opinyon tungason kaayo. Suwerte na kon makasud siya sa Top 10. Aw, basin pa diay mausab ang dagan sa hangin no, ug mohimog dakong milagro si Rabiya sa pageant night sa Amerika. Posible kaha? Mao nay atong atangan!
