UNOM ka tuig na ang nilabay sukad nisikat ang usa ka flower garden sa Barangay Sirao, Cebu City.

Gidagsa sa mga tawo ang Sirao Garden kay perfect siya for picture taking. Sa pagbisita sa Superbalita Cebu sa Sirao Garden niadtong Oktubre 2015, gahilera nga mga celosia o burlas, coxcomb o tapay, rosas, daisy ug baby’s breath.

Fast forward sa Oktubre 2021, dako kaayo og kausaban ang Sirao Garden. Mas ninindot. Gitawag na kini karon og Sirao Garden Little Amsterdam tungod kay gipamutangan na siya og mga kahimanan o kasangkapan nga popular sa Siyudad sa Amsterdam sa Netherlands, usa ka bugnaw nga nasod sa Europe nga naila sa iyang mga buwak ug pagbisikleta sa mga tawo.

Karon, wala nay burlas ug tapay apan anaa pay daisy ug rosas.

Matod sa tag-iya nga si Helen Chua, giundang na nila ang pagtanom og burlas ug tapay kay dili na maayo ang yuta para ani nila nga mga buwak. Sa sige og tanom, nikupas ang kolor sa burlas ug tapay. Nimenos ang kapuwa ug ka-amarilyo nila.

Karon, ang gipangtanom mao na ang “pink queen,” “sage” ug uban pang mga tanom nga kasagaran makita sa Europe. Si Helen Chua usa ka kanhi international flight stewardess ug ang iyang mga nakita ug nakat-onan sa iyang mga biyahe iyang gidala o gi-apply sa Sirao Garden.

Makita sa Sirao Garden Little Amsterdam ang giant red sunflower, usa ka talagsaon nga variety sa sunflower.

Daghang dapit sa Sirao Garden Little Amsterdam nga nindot piktyuran ug magpa-piktyuran. Aduna kini “proposal area,” “blessed hands area,” “bridge area,” “Combi area,” view deck ug uban pa.

Modawat sila og pre-nuptial pictorial o photoshoot sa bayranan nga P2,500 ug libre na ang lima ka tawo.

Ang entrance fee anaa sa P50 para sa mga bata 12 years old and below; P100 para sa 13 years old hangtod 59 years old; ug P80 para sa senior ug PWD.

Kon walay uwan, mas maayo iadto sa wa pay alas 10 sa buntag ug hapit nang alas kwatro sa hapon kay nindot ang natural light niini nga mga oras.

Mas nindot og gawas ang imong pictures.

Sa mga babaye, mas maayo magsul-ob og flat shoes aron sayon ang imong paglakaw ug pagsaka-saka. Ang gidak-on sa Sirao Garden Little Amsterdam kay 1.5 ka ektarya.

Adunay laing gitawag og Sirao Garden, apan ang pangitaa mao ang Sirao Garden Little Amsterdam.

Aduna kini karatolang dako sa gawas.