USA sa labing gamit nga parte sa sakyanan ang busina. Alang kini sa kaluwasan sa nagsakay sa sakyanan ug uban pang naa sa karsada. Apan ang nakapait, sagad gamiton lang ni sa driver nga nasuko, magpaugat sa karsada.

Niadtong Dominggo samtang nagdulhog ko padung sa Brgy. Pulangbato, wa dayon ko makabantay sa kasugat nga awto sa blind curve nga bahin sa karsada. Maayo gani kay naka-brake dayon ko ug nakalihay sa sakyanan. Nakapanghupaw kog lawom kay ang mao nga karsada, likuon ug pit-os kaayo.

Later sab ning semanaha, samtang naghatod ko sa akong asawa sa GMA 7 sa Nivel Hills, Apas, nilupad makadiyot ang among espiritu. Kinsa bay di makuratan nga duna may multicab nga among gikasugat nga diha pa nasubay sa among lane.

Kusog ang iyang dagan samtang nagtungas ug kami paliko ug padulhog. Maayo gani wa ko maratol, dali kong nakalubag gamay sa manubela sa scooter. Ang driver nakabantay dayon namo kay nibusina man ko.

Yes, busina. Mao ni ang akong buhaton kon moliko o nagdulong ko sa blind curve aron maalerto ang akong kasugat.

Busina

Ang pagbusina importante kaayo basta moliko sa blind curve. Alang ni sa imong kaluwasan ug sa imong mga kasugat. Kon mobusina ka, maalerto ang mga driver nga wa pa makakita nimo, makapamenor sa sakyanan.

Apan namong nagbiseklita, di ni namo mahimo. Busa maayo unta nga kon ikaw nagmaneho og sakyanan sa kadalanan sa kabukiran, di kalimtan ang pagbusina. Kay segurado ning makaluwas og kinabuhi ug malikayan ang aksidente.

Mobusina usab ko sa mga residential area o mga dapit nga dunay naka-park nga mga sakyanan kay naa ra bay ubang pedestrians mokalit lang og guho ug molabang sa karsada nga di magtan-aw. Few times nakakita na ko ani nga mga sitwasyon sa disgrasya.

Signal lights

Laing safety device sa sakyanan mao ang signal lights, atubangan ug likod sa sakyanan. Apan makaguol nga ning panahuna pipila na lang ka drivers ang mogamit niini. Sukad ko nagbiseklita, daghan nang mga higayon nga napiit ko sa mga sakyanan kay nakasunod kog sakyanan nga moliko diay, apan wa mosignal.

Pila ra man gud untay pagsignal, apan daghan sa drivers karon ang nagpabaya niini. Mao bitaw nang dunay nangadumbolan kay modiretso lang og liko nga di mosinyas, ang nagsunod uwahi nang nakabantay.

Magmaneho gani ta og sakyanan, atoang ibutang ang atong kaugalingon diha sa karsada. Uban sa pagmatngon, di nato kalimtan ang safety devices nga naa sa atoang tagsa ka sakyanan aron malikayan ang disgrasya.