KINSAY magdahom nga maminyo si Leonard tungod sa iyang sip-on? Ting-uwan kadto. Gihilantan siya. Pugngan niyang magtutikuka sa kakatol sa iyang tutunlan.

Apan ang di niya kapugngan mao ang iyang sip-on.

Luwan siya sa usa ka bus paingon sa Taloot, Argao, nga ang mga pasahero naghuot ug nagkumbitay ang mga kamot sa taas nga tubo sa atop sa sakyanan. Hilabihan na niyang nakapugong nga dili makasikma o makahatsing. Apan kinsay magdahom nga mabuhian niya ang dala niyang panyo nga gitabon niya sa iyang ilong nga nagping-ot? Kalit nga nawani ang iyang panyo ug nakasikma siya sa iyang sip-on ngadto sa dughan sa usa ka babaye ug mipilit niini ang iyang plema. Mikisikisi ang babaye sa kalisang ug misiyaok. Kalit nga nahaurong ang bus ug nakuyawan ang drayber sa alingisig nga tiyabaw sa babaye.

Ang naghuot nga mga pasahero nadusmo ug natikay-ang kay ang babaye nagpadayon sa pagkisikisi sulod sa bus. Mibadlong ang konduktor apan halayo ra siya sa suok nga gikisi-kisihan sa babaye.

Ug si Leonard nayagaw usab sa iyang kaugalingon, natarantar. Ug sa tinguha nga dili na malisang ang babaye, kalit nga mikab-ot ang iyang palad ug nabagnod kini sa bukas nga dughan aa babaye. Labi pang naglungkaob ang panghitabo kay mibanghag ang babaye ug unya nakuyapan sa tumang kalisang.

Ang palad ni Leonard nagkamuritsing sa iyang kaugalingong sip-on, ug ang tanang mga pasahero naglumba pagkawas sa bus. Nagyawyaw sila sa kagaw nga anaa sa palad ni Leonard nga nagwara-wara niini ug unya misalibay niini sa hangin.

Nadala si Leonard ug ang babaye sa presinto sa kapulisan. Nagkaila sila human mopiti ang iyang nawong sa usa ka sagpa sa babaye. Hilabihan niyang nakapangayog pasaylo sa babaye.

Ug nakalitan siya sa mga pulong sa naglagot sa babaye: “Kinhanglan pakaslan ko nimo kay nakahikap ka na kanako!”

Ang mga pulis nahikatawa. Tambok ang babaye ug bukas ang ibabawng dughan kay ang gisul-ob nga blawos niini urog sa spaghetti ug nabugto pa ang usa niini nga iyang nakab-utan sa iyang palad kaganina.

Nahikatawa sa hilom si Leonard. Kap-atan na ang iyang panuigon ug ulitawong guwang kay di siya makamaong mangulitawog babaye. Kulhanon siya. Sungugon gani siya sa iyang ginikanan ug mga kadugo kon kanus-a siya magminyo. Ug karon ania ang usa ka babaye nga tambok, hamtong na usab, ingon sa dalagang guwang usab – konserbatiba.

Gikan sa estasyunan sa kapulisan, milahos sila si Leonard ug ang babaye ngadto sa panimalay sa babaye. Nagkaila sila sa babaye nga ginganlan og Marichu. Nahimamat niya ang mga ginikanan ni Marichu nga miantihay og katawa sa ilang atubangan ug nagasungog: “O, may nakaplagan na diay ang buriring namong anak! Maminyo na diay siya ning lalakeha!”

Wala kapugngi ni Leonard nga mahikatawa. Apan ang sip-on niya sa iyang ilong miispiso na ug kasikmahon na siya. Abtik si Marichu nga mikuot og panyo sa iyang bag ug gitunol kini kang Leonard. (Katapusan)