DILI masukod ang gugma ug sakripisyo sa usa ka inahan ngadto sa iyang mga anak.

Tanang mga pag-antos ang buhaton aron makab-ot sa mga anak ang ilang kalampusan nga maoy gipangandoy sa ilang mga ginikanan.

Sama sa sugilanon sa pamilya nila ni Diana May Batucan, 25.

Iyang giila ang dako nga sakripisyo ug pagpangga sa iyang mga ginikanan labi na sa iyang inahan nga si Dolores “Kap Dolor” Batucan ngadto nila managsuon.

“Kon unsa man mi karon tungod ni sa ilang paningkamot,” pahayag ni Diana.

Agi og pagpasalamat sa tanang mga pag-antos ug dako nga paghigugma ngadto sa ilang inahan nga si Kap Dolor, ila kining giandaman og party uban sa iyang igsuon nga si Lemuel nga tua sa Dubai nanarbaho, alang sa kasaulogan sa ika-60 nga kasumaran sa adlaw nga natawhan niini kagahapon, Pebrero 27.

Usa ka beach party ang ilang gihimo sa usa ka resort sa Barangay Luyang, lungsod sa Carmen.

Apil sa iyang mga bisita sila si Provincial Board Member Andrei “Red” Duterte, Carmen Mayor Carlo Villamor, kanhi mayor ug karon Konsehal Martin Gerard Villamor, mga kauban sa pagpanerbisyo, mga kaliwat ug kahigalaan.

“Milestone sa usa ka tawo nga makaabot og 60 years old. Ganahan ko malipay siya. Kini siya pag-pay off, dili ni makatupong sa iyang mga sakripisyo alang sa amoa,” dugang ni Diana.

Si Diana ang nagpahimutang sa tanang mga kinahanglanon ug mga pagkaon sa dako nga selebrasyon sa birthday sa ilang inahan nga nangalagad isip kapitan sa Barangay Luyang, Carmen.

Alang ni Kap Dolor espesyal ang kasaulogan sa iyang birthday karong tuiga tungod kay nakahigayon sila pag-bonding sa iyang pamilya, mga higala ug kauban sa pagpanerbisyo.

“Nagpasalamat gyud ko sa Ginuo nga gihatagan ko niya og good health unya special gift gyud niya ang kinabuhi nga nakaabot ko ani edara,” pahayag sa pagpasalamat ni Kap Dolor. (SCG)