Midagayday ang mga luha ni Jennifer Belen Abellanosa dihang gisurprisa siya sa iyang pamilya ug mga higala sa iyang ika-32 nga kasumaran sa iyang adlaw nga natawhan.

Niadtong Agusto 27, samtang busy nga nangandam si Jennifer sa iyang igbaligya nga mga isda sa merkado publiko sa Barangay Inayawan, siyudad sa Sugbo, niabot ang iyang mga higala ug pamilya ug gisurprisa ang “suga” sa ilang panimalay.

Apil sa ilang surprisa ang bouquet sa mga rosas ug mga salapi sa tag P500 ingon man cake.

Ang mga kwarta nga giapil sa bouquet sa mga rosas, tinigom sa iyang kamaguwangan nga anak nga si Kylee, 14.

Samtang ang mga higala ni Jennifer pinangulohan ni Rosalie Arriesgado, nakigsabot og grupo sa mga mangantahay ug niharana sa birthday celebrant.

Si Jennifer nga natandog sa surprisa nga gihimo sa iyang pamilya ug mga higala, wa makapugong sa paghilak ug dali nga namahid sa iyang mga luha.

“Nihilak siya. Nagpahipi gani na siya sa styro, kanang humolanan sa mga isda, kay wa siya kasuway ingon atuon. Na-surprise siya. Wa siya mag-expect,” asoy ni Rosalie, suod nga higala ni Jennifer.

Gawas sa maong mga surprisa, gidayandayan usab nila ang multicab nga kanunay kargahan ni Jennifer og mga isda nga may nakasuwat nga “Happy birthday” ug may mga balloon.

Gihulagway ni Rosalie ang higala nga buotan, manggihatagon ug matinabangon sa iyang mga igsuon ug sa pamilya sa iyang bana. (SCG)