WALAY mangingilad kon walay magpailad. Apan dunay pormal nga pangilad nga daghan ang mahaylo kay tugob sa pamasin ang tawo. Securities and Exchange Commission (SEC) mipasidaan o miabiso na sa 47 ka investment schemes nga misaad og paspas nga pagtubo sa kwarta nga ang ubang pagdani ipaagi sa social media. Naglakip sa The God Almighty Cooperative, Organico, Oliva, Ada, Forex, Scentco, Brendahl, Yellow Dot Transport Terminal Inc., Tabali Cacao Farms, Tuga Chat Academy, SGP Dragon Trading, Requiza Poultry, Crowd Royals, daghan pa. Maoy baniog kaayo kadtong Kapa Ministry nga religious corporation milampos sa pagpangagni og puhonan nga tawgon og donasyon unya ang interest tawgon og gift of love. Kapin sa milyon ang miyembro. Dali rang mabawi ang pohonan kay gisaaran sa 30 porsento ang tubo matag bulan. Lalim nang kabos padatoon (kapa). Nagsugod sa Surigao, General Santos, ubang bahin sa Mindanao ug mikatap dinhi sa Sugbo. Naukay human ang SEC miluwat og cease and desist order kay wala mahisubay sa palisiya sa kagamhanan. NBI mikiha og syndicated estafa batok sa tagdumala Pastor Joel Apolinario ug kadagkoan. DOJ mitukod og panel of prosecutors alang sa paspas nga inbestigasyon. Nakasumitir na ang Kapa og counter affidavits ngadto sa DOJ nga maoy motimbang sa pagduso unya ngadto sa korte.

Susamag pyramiding o estelo sa networking. Bulahan kadtong nakaunag recruit og mga downliners kay makadawat og porsento. Apan ang mga downliners nga naka-invest unya wala maka-recruit sanglit milapas ang ilang target market manulo ang ilang kwarta. Hala pamasin pa more.

Diha kadtoy nahaylo sa Aman Futures nga tam-is ang gitanyag nga “double your money scheme” sa pasalig nga motubo og 80 porsento sa ibutang nga pohonan sulod sa pipila ka adlaw. Gidagan sa Malaysian Founder Manuel Aman Amalilio nga nagtago-tago sa Kota Kinabalo, Sabah, Malaysia. Liboan ka mga biktimang vendors, mag-uuma, drivers, retirado, polis, military ug OFW. Gisundan sa pyramiding scam nga naglambigit sa kanhi DPWH Sec. Bashir Rasuman. Sama sa pagdumala og bangko nga nalabas ang deposito. Busa ayaw padani sa tam-is ug pormal nga pagpangilad. Inay nagtinguha og ting-usbawan siyakoy ang ibutang nga investment.

Lain sab tong modernong pangilad subay sa pagtumaw sa bag-ong teknolohiya nga ATM skimming. Mogamit og device aron makuha ang deposito sa wala mailhi nga responsabli. Mitumaw kadtong katahap nga inside job. Nabiktima ang mga politiko, polis ug huwes.

(csa_1156@yahoo.com/09064648954)