ASA ka mangita'g mga tawo nga mopahiyom bisan motanyag og pahasubo ngadto sa higala nga namatyan og suod sa kinabuhi? Ang mga magbilar sa namatyan magsugal, magtagay ug magbinayloay sa mga estoryang binutbot. Bahakhak, diri, bahakhak didto.

Dinhi ra tingali kini hikaplagi sa Pilipinas. Gani sa unang panahon, duna pay gitawag nga “Kulilising Hari” sa mga magbilar sa namatay. Magtigi sila sa pagpakatawa ug kadtong mokatawa, silotan, paludhon ug paampoon.

Kadto rang mga pangag ug daotan og ngipon ang magpugong-pugong sa pagkatawa. Apan kon di na gyud kapugngan, mopahiyom ug mokatawa gihapon, pero tabunan sa kamot ang baba. Bisan sa kaguol, mokatawa lang gihapon.

Apan apektado ang kalipay sa mga Pilipino sa mga lockdown, sa pagkabalda sa inadlaw nga lakat sa kinabuhi ug sa mga nangamatay tungod sa Covid-19 pandemic, sumala pa sa 2021 World Happiness Report sa United Nations Sustainable Development Solutions Network.

Gikan sa ika-52 nga malipayon nga nasod sa 149 ka mga nasod nga naapil sa ranking, nahagsa ang Pilipinas ngadto sa ika- 61. Gibasihan ang tulo ka tuig nga datos sa Gallup World Poll. Gikomparar ang datos sa survey sa tuig 2020 sa datos gikan sa 2017 hangtod 2019 aron masayran ang epekto sa pandemic.

Apan samtang apektado kita sa ranking, way epekto ang pandemic sa “well-being,” sa maayong panglawas ug kamaya sa mga Pilipino. Si John Helliwell, usa sa mga authors sa maong report, niingon nga usa sa mga rason mao nga nisamot ang panagsuod sa mga tawo tungod sa pandemic.

Sama sa pasiaw sa usa ka tiguwang babaye nga bag-o lang nakadawat og usa ka sakong bugas humay ug mga linata nga pagkaon. Gi-interview siya sa usa ka reporter.

Matod niya, “Sa wa pa ning Covid-19, wa gyud ko kadawat ani gikan sa gobyerno. Busa, nagpasalamat sa Covid-19. Hinaut nga kini magpadayon.”

Bisan sa tumang kalisod, ang mga tawo manikaysikay gihapon, sama sa kanta nga “Ginhawa Delfin.”