ADUNAY gubat kontra druga ang kapulisan. Linibo na ka mga tawo nga nalambigit sa illegal nga drugas ang napatay sa maong gubat. Apan nitumaw nga dunay mga sakop sa kapulisan nga nag-recycle sa mga nasakmit nga illegal nga drugas.

Nigawas ang termino nga mga “ninja cops.” Mao nga ang kadagkuan sa Philippine National Police nilusad sa usa ka kampanya sa “internal cleansing” aron sa paglimpyo sa kapulisan gikan sa mga scalawags.

Tumong niini ang pagpanalipod sa integridad sa PNP ug sa mga sakop niini. Mao tingali kini ang hinungdan nga gihulma ang PNP-Integrity Monitoring and Enforcement Group (Imeg).

***

Kon dunay ronda kontra druga, duna say ronda kontra du’g. Ang mga sakop sa Imeg Visayas Field Unit, Regional Investigation and Detective Management Division (RIDMD) ug Regional Intelligence Division (RID) 7 midakop sa hepe sa Argao Police Station human maaktohi nga nakigdulog sa babayeng piniriso sulod sa iyang lawak.

Nasikop si Police Major Ildefonso Miranda Jr. uban sa duha ka babayeng binilanggo, usa iyang gikadulog sa kama sa iyang lawak, niadtong Huwebes sa gabii, Marso 5. Mao kini ang unang nahitabo nga ronda kontra du’g sa Sugbo.

Nabisto si Miranda kay usa ka konsehal sa Argao, uban sa duha ka pulis, nakigtagbo sa Imeg Visayas Field Unit niadtong Marso 4 ug gitug-an nga usa ka babaye nga nabilanggo sa kalapasan sa Comprehensive Dangerous Drugs Act 2002, naa kanunay sa iyang lawak.

***

Si Miranda gipulihan na niadtong Biyernes, Marso 6, ni Police Captain Elstone Dabon III. Samtang gimandoan ni Police Brigadier General Albert Ignatius Ferro, hepe sa Police Regional Office 7, ang RIDMD sa pagpaubos sa imbestigasyon sa tanang pulis sa lungsod sa Argao.

Daghan ang posibleng maangin sa pakigdu’g ni Miranda sa usa ka babayeng piniriso. Apan nganong maapil man sila nga wa man sila makaapil og tanday? Bahala na si Miranda nga mag-atubang og mga kasong administratiba ug kriminal.