WAY undang ang kahingawa kay wa pa gani mahuman ang Delta variant, mitumaw na sab ang Omicron variant. Tungod ini mitaas ang gasoline ug mga nag-unang palaliton unya mi-ubos sab ang stock market.

Niadtong Nobiyembre 24, 2021 ang World Health Organization (WHO) mitaho nga nagsugod kining bag-ong variant sa SARS-CoV-2, B.1.1.529 nga gitawag og Omictron didto sa Botswana ug South Africa.

Dali kining mikatag sa lain-laing nasod maong ang uban automatic dayong ni imposar sa ilang travel bans sama sa Japan, Singapore ug Germany.

Sa pagkakaron mao ni ang mga nag-unang impormasyon nga ilang gipahibalo:

Mas paspas ug dali kining mokatap ug takod ikumparar sa orihinal nga SARS-CoV-2 virus ug Delta. Di kini ka kumpiyansaan kay motakod kini kang bisan kinsa, nabakunahan o wala.

Puno sa mga eksperto susama kini og simtomas sa coronavirus sama sa hilanat, katol-katol sa tutunlan, ubo, pagpang hapo, hangos iginhawa ug pagpanakit sa kaunuran. Di hinuon kini makapawala sa panlasa ug panimhot.

Ang bakuna nga nahatag ug booster shots dako kaayo og matabang pagprotihir sa atong lawas nga di magrabihan kon matakdan o ma-ospital itandi niadtong way klarong panagang.

Matod sa mga scientist ug awtoridad, ang mga Covid-19 vaccines dako og matabang pagbatok sa Covid-19 maong padayon silang nag-awhag sa tanan nga magpabakuna singko anyos pataas unya kadtong 18 pataas magpa booster shot sab 6 ka buwan human sila nabakunahan.

Ang pag-sul-ob og masks dako sab og matabang labi na sa mga pampublikong lugar aron di matakdan. Ipadayon ang social distancing, hugas sa kamot gamit ang sabon, pag-gamit og hand sanitizer o alcohol unya mangabre sa bintana aron di mabuot ang hangin.

Likayan sab ang pag adto og mga lugar nga daghan og tawo ug mga kalihukan, party o pundok-pundok.

Ang mga mananambal , eksperto ug sayentipiko sa tibuok kalibutan padayong nag-awhag sa katilingban sa pagpabakuna aron ma protektahan ang kaugalingon ug mohinay ang pagkatap ini.