USA sa sa mga makat-onan sa usa ka boksedor mao ang gitawag nga kombinasyon. Mahimo kining “jab, jab” human “straight” mahimo sad nga “straight, right hook,” unya “left upper cut”. Sagad tagtulo gyod ni ang kombinasyon. Kining mga hanas kaayo nga mga boksedor daghang kombinasyon ang nakat-onan.

Makahayang ang kombinasyon. Sagad dili na ni nila mistil hunahunaon pa kay awtomatik na. Kining mga kombinasyon anaa sa ubang pangamot ug bulohaton.

Adunay kombinasyon ang atong ebanghelyo nga naghisgot mahitungod sa paghigugma sa kaaway ug sa dili paghusga sa uban. Sukwahi kini sa kombinasyon nga makapatomba sa kontra. “Ug sama nga buot nino nga buhaton kaninyo sa mga tawo, buhata usab sa ingon ngadto kanila,” ang unang punto. Gitawag kini og “bulawan nga lagda” nga gibatbat ni Jesus sa iyang tawag: “Panalangini ninyo ang mga nagatunglo kaninyo, i-ampo ninyo sila nga nagapasipala kaninyo...” Sama kini sa pulong ni Jesus sa krus: “Amahan, pasaylo sila, kay wala sila masayod unsay ilang gibuhat”. May mga panahon usab nga kita wala masayod sa atong ginabuhat ug ang atong gikinahanglan mao ang pag-ampo dili pagkondenar.

Ang ikaduhang punto mao: “Pagmaluluy-on kamo sama usab nga ang inyong Amahan maluluy-on”. Ang maluluy-ong tawo hingpit kay ang pagkamaluluy-on mao man ang kahingpitan sa Dios. Ang paghigugma sa kaaway manukad sa kaluoy. Kaluoy kini nga, una sa tanan, nadawat nato gikan sa Ginoo. Kon dili tagamtamon kining maong kamatuoran ang paghigugma sa kaaway mahimong masokismo kay tawhanong gahom lamang ang gisaligan. Gipatunobtunoban ang kaugalingon kay wala kini mosandig sa kaluoy sa Dios.

Ang tawong magpuyo subay sa bulawan nga lagda ug magmaluluy-on pun-on sa Dios sa Iyang mga gasa. “Panghatag kamo ug pagahatagan kamo; ang igong taksanan nga nadasok, nayugyog nga nagaawas, ihatag sa inyong mga sabakan; kay ang taksanan nga gigamit ninyo pagsukod, mao usab unya ang isukod batok kaninyo”. Buhong kaayo ang madawat sa usa ka buotan ug maluluy-on nga tawo.

Maluluy-on ang usa sa mga katigulangan ni Jesus nga si David. Mahimo na unta niyang patyon si Hari Saul nga buot mopatay kaniya apan. Giila ni David nga pinili gihapon sa Dios ang iyang kaaway. Sa pagbuhat niya niini, si David milabang gikan sa usa ka lawasnong tawo ngadto tawo nga espirituhanon, sa pulong pa sa sulat ngadto sa mga taga-Corinto.

Walay gitomba nga tawo sa kombinasyon nga gitudlo ni Jesus. Hinunoa, nakapabarog kini sa tinuoray nga kalinaw ug panagdait. Garbo ang gipatomba niini.

Unsang kombinasyon ang atong nakat-onan aron pagbuntog sa atong mga kahuyang?