MAAYO kay molihok na og maayo si Presidential Assistant for the Visayas Michael Dino aron dalion pag-aprobar sa National Economic Development Authority (Neda) ang unsolicited proposal alang sa pagtukod og monorail transit system dinhi sa Sugbo.

Ang monorail dunay tulo ka phases. Ang una magkonektar sa Siyudad sa Sugbo ug Mactan Cebu International Airport (MCIA). Ang ikaduha molagbas gikan sa Dakbayan sa Talisay ngadto sa Mandaue City. Ang ikatulo motadlas gikan sa Dakbayan sa Carcar ngadto sa Danao City.

Gikinahanglan kining dalion kay gawas nga gikinahanglan na ang pagpaluag sa trapiko, ang pagpalangay niini mag-uswag usab sa pagsugod sa proyekto. Kon langayon hayan di pa ni masugdan sa panahon ni Duterte.

Ang monorail tipik lang sa intermodal nga sistema sa transportasyon nga maglakip usab sa Bus Rapid Transit (BRT). Gawas sa BRT, maanindot usab tong gihisgutan ni Duterte nga gagmay nga train ang ibutang dinhi sa Dakbayan sa Sugbo kay lisod na ang pagpalapad sa mga karsada. Matod niya nga gagmay nga train ug pataas nga agianan ang kasulbaran kay di na mapalapdan ang mga dan dinhi.

Di na tuod mapalapdan. Busa, ang MRT, BRT ug skyways haom nga mga imprastraktura sa sitwasyon sa Dakbayan sa Sugbo.

Di na lang unta mokomentaryo og negatibo si Konsehal Joy Augustus Young tungod kay kanang mga lalis maoy nakalangay ning mao nga mga proyekto nga sa panahon pa sa iyang amo nga si kanhi mayor Tomas Osmeña gituki, wa pa masugdi.

Dakong problema ang trapiko sa Dakbayan sa Sugbo. Ang dakong problema, nagkinahanglan og dakong gahin, di kanang kinuripot nga gasto ug tagi-tagi nga solution. Mao na unta ni ang kahimtang sa panghuna-huna sa mga opisyal.